Comité independent «NA a l’iniziativa cunter la SRG SSR» avertescha da consequenzas massivas per infurmaziuns fidablas e da dapli influenza da l’exteriur

L’iniziativa «CHF 200 bastan!» n’è betg ina simpla mesira da spargn. Ella smanatscha il service public ed indeblescha la Svizra. Spezialmain en temps intscherts dovri in access cumplain ad infurmaziuns fidablas. RTR, SRF, RTS, RSI e Swissinfo procuran che nus avain access en tut las parts dal pajais ad ina rapportaziun independenta e fundada ed ans protegian da dischinfurmaziun. La campagna duai esser visibla en tut la Svizra. Per la campagna da placats naziunala tschertga il comité anc var in milliun francs daners da donaziuns.

Infurmaziuns fidablas e protecziun cunter dischinfurmaziun

Infurmaziuns fidablas èn indispensablas per ina Svizra segira. En ina situaziun mundiala instabila infurmescha la SRG SSR a moda credibla davart eveniments internaziunals, crisas e catastrofas da la natira. Cun smesar ils meds vegniss sutminada l’abilitad da la SRG SSR da surpigliar sia incumbensa sco funtauna d’infurmaziun independenta per la populaziun.

La SRG SSR stat per fatgs verifitgads, in schurnalissem da qualitad ed ina vasta rait da correspundentas e correspundents. En temps cun ina dischinfurmaziun creschenta, cun cuntegns manipulativs e novitads nunvairas generadas dad AI è ina funtauna d’infurmaziun credibla pli impurtanta che mai.
Cun sia rapportaziun e contextualisaziun furma la SRG SSR la basa per decisiuns che sa basan sin fatgs, contribuescha confurm a sia incumbensa a la furmaziun libra da l’opiniun e rapporta objectivamain. Smesar ils meds da la SRG SSR dess libra via a dapli influenza da l’exteriur. «Ina cuntrada mediala multifara e d’auta qualitad sco er ina cooperaziun equilibrada da las medias privatas e publicas ans protegia da dischinfurmaziun e da l’influenza da l’exteriur. Quai na dastgain nus betg metter en privel nunponderadamain», accentuescha Matthias Michel, cusseglier dals chantuns da la PLD a la conferenza da medias dad oz.

Ina chasa da medias per l’entira Svizra

Grazia a la SRG SSR han tut las parts dal pajais access ad ina purschida da radio e televisiun equivalenta en lur lingua: RTR, SRF, RTS, RSI e Swissinfo procuran che era regiuns perifericas e minoritads linguisticas vegnian provedidas cun infurmaziuns fidablas. La SRG SSR rapporta era là, nua ch’i dat strusch pli medias. D’ina ferma SRG SSR profitan umans en regiuns ch’èn pli lunsch davent dals gronds centers ed umans en tut las regiuns dal pajais.

Martin Candinas, cusseglier naziunal da la partida Il Center, ha punctuà a la conferenza da medias dad oz en il Center da medias da la Confederaziun a Berna: «Sche nus smesain ils meds da la SRG SSR, vegn quai ad avair in effect surproporziunal sin donn e cust da la cuvrida mediala da las regiuns perifericas e da las minoritads. L’iniziativa periclitescha la coesiun e la diversitad linguistica che rendan unics noss pajais.»

Independenta da dumbers da clics e da possessurs

La SRG SSR sa finanziescha cun taxas – ella tutga a nus tuttas e tuts e betg a singuls possessurs.
Questa independenza lubescha da tractar temas ch’èn relevants per la societad, era sch’els na portan betg grondas quotas d’auditori u blers clics. La plazza da medias svizra viva da la dualitad da medias publicas e privatas. La smesada da las taxas da la SRG SSR mettess en privel senza basegn quest sistem cumprovà.

Roger Schnegg, directur da Swiss Olympic, di: «La SRG SSR è indispensabla per il sport svizzer – ella na mussa betg mo eveniments d’emprima classa, mabain era sport da giuvens talents, da persunas cun impediments e sports marginals. Ina smesada dals meds fiss in’attatga directa sin questa diversitad e visibilitad.»

L’iniziativa sfurzass la SRG SSR da reducir sia purschida a moda anc pli massiva. Blers programs populars sco la seria «Tschugger», emissiuns da profundaziun sco «DOK» u emissiuns da sport live popularas na pudessan lura betg pli vegnir producidas. La cultura ed il sport svizzer perdessan ina plattafurma impurtanta.

L’iniziativa sfurzass la SRG SSR da reducir sia purschida drasticamain

La SRG SSR ha gia instradà programs da spargn considerabels ed ina restructuraziun. Fin il 2029 sto ella spargnar 270 milliuns, perquai ch’il Cussegl federal ha decis quai per ordinaziun. Quai èn var 17% dal budget annual da la SRG SSR. L’iniziativa «CHF 200 bastan!» pretenda in’ulteriura reducziun drastica dals meds da la SRG SSR. Las disposiziuns transitoricas pretendan en pli da realisar l’iniziativa entaifer 18 mais e pericliteschan uschia la basa dal service public.

Ina vasta allianza cunter l’iniziativa

Il comité independent NA a l’iniziativa cunter la SRG SSR unescha vuschs da tut las partidas politicas e da tut las regiuns linguisticas – da la cultura populara sur il sport e la politica fin a la generaziun giuvna e la Federaziun svizra dals surds che ha translatà la conferenza da medias en lingua da segns. La campagna che cumbatta l’iniziativa duai esser visibla en tut la Svizra. Per la campagna da placats naziunala tschertga il comité anc var in milliun francs daners da donaziuns.